Wednesday, January 29, 2020

येताच तू...

येताच तू, मज, सुगंधी भास व्हावा,
जरासा अत्तराचा, हा श्वास व्हावा..

विसरून काळ जावा, भुलून वेळ जावी,
दिशांचा ही नको, मग अदमास यावा..

तू स्पर्शून जावे, मी मोहरून जावे,
एक स्पर्श चोरटा, बस हाच ध्यास व्हावा..

माझे तुझे हे, क्षितिज लोप व्हावे,
सोहळा मिलनाचा, असा खास व्हावा...

#मोहा

Saturday, January 25, 2020

तुझे ऊन...

तुझे ऊन माझ्या अंगणी उमलले कसे?
उगवतीलाच ना रे? पण ते कलले कसे?

तुझ्या सावलीला मज बसू दे जरा ना,
अरे, सोडून एकटे मला हे चालले कसे?

कवडसे इथे बघ छान उमटायचे ते,
ओंजळीत सारे ते तू उचलले कसे?

सावल्या माझ्या तुझ्या लांब गेल्या,
मनात आत थोडे काही, हलले कसे?

#मोहा