Friday, May 27, 2022

वेचू दे ना..

ओठांवरचे टिपूर चांदणे, वेचू दे ना,
सावरू नको, पदर जरासा खेचू दे ना...

येतो म्हणता पाऊस वेडा, अडला कोठे?
अलवार मनाचा मोर जरासा नाचू दे ना...

आलीस अताशा, लगेच का हे जाते जाते?
आठवणी कातर काही, मनतळाशी साचू दे ना...

वळणावरती पुढच्या, वाट वेगळी होते बघ,
सोबत असू तोवर,काही गझला सुचू दे ना...

अन मग निघून तू गेलीस त्या गावाच्या,
काही खबरा, हळव्या बाता, वाचू दे ना...

प्रवास खडतर, तरी पैलतीरी जाऊ सोबत,
ह्या साऱ्या वचनांचे बंध मनाला काचू दे ना...

#मोहा

4 comments: